-Хямралын гол шалтгаан оффшор бүсээс үүдэлтэй-
Монголчууд сүүлийн жилүүдэд “ОФФШОР” хэмээх танилтай болж, дээр, доргүй л “түүний” тухай ярих болсон. Төрийн ордноос эхлээд түмний дунд ч оффшорын талаар ярьж хэлцэн, эхэндээ ч оффшор данстай төрийн түшээдийн талаар яригддаг байсан бол сүүлдээ энэ төрлийн банкны карт, өмдний тэлээ гэх зэргээр мэтгэлцэж бас маазрах болсон. Их маазрал эцэст нь оффшор данстай улстөрчдийг мартагнуулсан нь ч саяхных.
Ер нь л оффшор гэдэг үг нь өөрөө улс төрийн хүрээнд “поп”-дох аятайхан сэдэв болсонтой холбоотойгооор улс төрийн хүрээнд явсаар ирсэн. Цэнхэр үстэй бүсгүй гадны орныг зорьж, хууль шүүхийн байгууллагад хандаж, эмэгтэйчүүд төв талбайд нүцгэнээр жагсаал зохион байгуулж, ТББ-ууд ч олон нийтийг уриалж, лоозон энэ тэрээр чимэглэн, сүрийг үзүүлэн аливаа сонгуулийн өмнөх боломжийн дуулиантай “пи-ар”-ыг эхлүүлдэг улалмжлал тогтох шахлаа. АН, МАН ялгаагүй гишүүд нь оффшортой, арга ядахад тэднийгээ ч “нулимж” чадна гэдгийг улс төрийн зарим хүчин үзүүлээд өнгөрсөн.
Тэгвэл энэ асуудлыг цэгцлэхийн тулд парламентад Оффшорын эсрэг лобби байгуулагдаж, энэ тухай УИХ-ын гишүүн Т.Аюурсайхан, Ц.Даваасүрэн, Н.Учрал, М.Билэгт, М.Оюунчимэг нарын гишүүн өчигдөр мэдээлэл хийсэн.
Гишүүдийн үзэж буйгаар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлэг өрнөж буй энэ үед лобби бүлэг байгуулах замаар цаашид хуулийн хэрэгжилтэд анхааран ажиллах юм байна.
Мэдээллийн эхэнд УИХ-ын гишүүн Т.Аюурсайхан “Түр хороог УИХ-ын тогтоолоор баталдаг. Бид тогтоолоо өргөн бариад албан ёсоор явна. Оффшорын эсрэг тэмцэл гэдэг өөрөө нам харгалзалгүй, бүх нийтийн тэмцэл байх ёстой. Өнөөдрийн хямралын гол шалтгаан нь өөрөө оффшор бүсээс хамаарч байна. Хуульд өөрчлөлт оруулах замаар данс эзэмшигчийн ах дүү, хамаатан саданг хуулийн хамааралд оруулж байгаа.
Ийм данстай хүмүүс гурван сарын дотор мэдүүлж байж, улс төрийн сонгуульд өрсөлдөх боломж нь нээгдэнэ. АТГ-аас холбогдох асуудлаар хяналт тавиад явах боломжтой. Гол нь, ийм хууль батлагдах учиртай. Оффшор бүсэд одоогоор Монголоос хэчнээн хэмжээний ам.доллар байгаа нь мэдэгдэхгүй байна. Үүнийг бид цаашид нягтлах болно. Оффшорын асуудлаар нэгдэж байгаа иргэний нийгмийн байгууллагуудтай тодорхой байдлаар холбогдож ажиллана” хэмээж байлаа. Мөн УИХ-ын гишүүн Ц.Даваасүрэн “Өнөөдөр Оюутолгой, Тамсагийн бүх мөнгө Монголоор орж ирэхгүй байгаа. Байгалийнхаа баялагийг зараад идчихсэн улсуудад өнөөдөр ямар ч хариуцлага хүлээлгэхгүй байна.Тэд авилгад авсан мөнгөө гадагшаа гаргаад оффшорт нуучихсан, ийм шударга бус байж болохгүй. ОУВС манай Засгийн газартай хэлэлцээр хийхдээ энэ тал дээр хяналтын тухайд огт дурдаагүй байна. Тиймээс бид цаашид түр хороо байгуулах замаар асуудлыг зохих газарт нь тавьж ажиллах болно. Оффшор дансны асуудлаар бид гадны томоохон орнуудаас мэдээлэл авах боломжтой гэж харж байна. Бидэнд эхнээсээ мэдээллүүд ирж байгаа. Тухайлбал, Швейцарийн банкинд нэлээд их хэмжээний мөнгө нуусан гэх мэдээлэл бидэнд ирсэн. Энэ бүхнийг бид холбогдох хууль хяналтын байгууллагатай нь хамтран нягтална” гэв.
Ийн хуулийн төслийг хэлэлцэх үеэр хяналт тавих лобби бүлэг байгуулагдсан бол нөгөө талд Хууль зүйн байнгын хорооны өнөөдрийн хуралдаанаар оффшорын тухай хууль буюу Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийсэн.
Анх Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн зорилтыг хангах, төрд итгэх иргэдийн итгэлийг нэмэгдүүлэх, нийтийн албаны үйл ажиллагааг хувийн ашиг сонирхлын зөрчлөөс хамгаалах зорилгоор Авлигатай тэмцэх газарт хөрөнгө орлогын мэдүүлэг гаргадаг төрийн албан хаагчдын хувьд гадаад улсын нутаг дэвсгэрт данс эзэмших, мөнгөн хөрөнгө байршуулах, хуулийн этгээд үүсгэн байгуулах асуудлыг хориглох талаар зохицуулалт хийх зайлшгүй шаардлага тулгарсан. Дээр дурьдсан хууль зүйн болон практик шаардлагуудыг үндэслэн Авлигатай тэмцэх газарт хөрөнгө орлогын мэдүүлэг гаргадаг төрийн албан хаагч оффшор бүсэд буюу гадаад улсын нутаг дэвсгэрт банкны данс эзэмших, мөнгөн хөрөнгө байршуулах, хуулийн этгээд үүсгэн байгуулахыг хориглох асуудлыг тодорхой зохицуулсан Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийг боловсруулсан байдаг.
Байнгын хорооны хуралдааны үеэр хэлэлцэж байгаа асуудалтай холбогдуулан зарчмын зөрүүтэй саналаар санал хураалт явуулсан. “Нэр дэвшигч, түүний хамаарал бүхий этгээд нь өөрийн нэр дээр оффшор бүсэд хөрөнгө байршуулсан, үл хөдлөх хөрөнгө бий болгосон бол гурван сарын дотор АТГ-т мэдэгдэж, мөнгөн хөрөнгийг эргүүлнэ” гэсэн саналыг байнгын хорооны гишүүд дэмжив. Хууль батлагдсанаас хойш гурван сарын дотор оффшорт байгаа хөрөнгийг татаж, зохицуулалт хийж чадах уу гэсэн Байнгын хорооны даргын асуултад Ажлын хэсгийн ахлагч Х.Нямбаатар “Анх зургаан сараар оруулж ирсэн. Байнгын хороон дээр гурван сар гэсэн санал нь дэмжигдсэн. ОХУ, АНУ-д энэ асуудлаар гурван сарын дотор хугацаа өгсөн байдаг” гэсэн юм. Харин УИХ-ын гишүүн Б.Дэлгэрсайхан гурван сарын хугацаанд амжихгүй гэсэн байр суурь илэрхийлсэн юм. Ингээд Байнгын хорооны гишүүдийн олонхийн саналаар гурван сар гэсэн хугацааг хүчингүй болгохыг дэмжсэн бөгөөд оффшор данстнуудын асуудлыг зургаан сарын дотор хөрөнгө татах зохицуулалт хийхээр боллоо.

Эх сурвалж: