Монголын Үйлдвэрчний эвлэлийн холбооноос өчигдөр Сүхбаатарын талбайд “Эрх ашгаа хамгаалъя” тайван жагсаалыг зохион байгууллаа. Тэд энэхүү жагсаалаараа Хөдөлмөр нийгмийн зөвшлийн 2017-2018 оны улсын хэлэлцээрийн биелэлт болон УИХ-аас сонгуулийн мөрийн хөтөлбөрийн хэрэгжилтийг шаардаж, тэтгэврийн насны нэмэгдэл, нийгмийн даатгалын шимтгэл, ОУВС-нд хамрагдахыг эсэргүүцэж буйгаа Засгийн газарт илэрхийлсэн. Тодруулбал, өнгөрсөн нэгдүгээр сарын 19-ний өдөр уг гурван талт хэлэлцээрийг байгуулах үед Засгийн газрыг төлөөлж Хөдөлмөр, нийгмийн хамгааллын сайд Н.Номтойбаяр, ажилтны эрх ашгийг төлөөлж Монголын үйлдвэрчний эвлэлийн холбооны Ерөнхийлөгч Х.Амгаланбаатар, ажил олгогчдын эрх ашгийг төлөөлж Монголын ажил олгогч эздийн нэгдсэн холбооны дэд ерөнхийлөгч Х.Ганбаатар нар гарын үсэг зурж баталгаажуулсан юм.
Тус хэлэлцээрт хүн амын хөдөлмөр эрхлэлт, хөдөлмөрийн харилцаа болон нийгмийн хамгааллын нийтлэг асуудлаар зөвшилцөх, Хөдөлмөрийн тухай хуулийн шинэчилсэн найруулга, Хөдөлмөр эрхлэлтийг дэмжих тухай, Ажиллах хүч гадаадад гаргах, гадаадаас ажиллах хүч, мэргэжилтэн авах тухай, Мэргэжлийн боловсрол, сургалтын тухай, Нийгмийн даатгалын тухай багц хуулиудад нэмэлт өөрчлөлт оруулах, ОУХБ-ын холбогдох конвенцүүдийг судлан, нэгдэх болон санхүү, эдийн засгийн бусад арга хэрэгслээр ажлын байрыг хадгалах, нэмэгдүүлэх, иргэдийн бодит орлогыг нэмэгдүүлэх нь зүйтэй гэсэн байр суурьтай оролцож байсан ч энэ бүхнийг одоог хүртэл ажил хэрэг болоогүй хэмээн жагсагчид үзжээ.
Тухайлбал, энэ талаар МҮЭХ-ны дарга Х.Амгаланбаатар “Хөдөлмөр нийгмийн зөвшлийн, гурван талт хэлэлцээрийн дөрвөн заалтыг Засгийн газар зөрчсөн. Эрх баригчид энэ оны улсын төсвийн тодотголыг олны хүчээр буюу хүч түрэн баталсан. Иймд Засгийн газраас гурван сарын өмнө байгуулсан хэлэлцээрээ биелүүлэхийг шаардаж байна” хэмээн онцолсон юм. Мөн долоон төрлийн татвар нэмж, иргэдийн тэтгэврийн насыг нэмснээр Засгийн газар МҮЭХ-той байгуулсан гэрээгээ зөрчсөн гэж тус холбоо үзэж буй аж.
Ямартай ч жагсаалд уул уурхай, геологийн хүнд хүчир ажил эрхэлдэг зэрэг нийт 18 байгууллагын ажилчид эрх ашгаа хамгаалахаар цугларчээ. Тэд “250 хоног ар гэрээсээ хол хүнд хортой нөхцөлд илүү цагаар ажилладаг”, “Идэж уух нь дутаад ирэхээр эдийн засгаа үүрч яваа ажилчдынхаа халаасыг хоослох боловсон дээрмийг эсэргүүцэж байна”, “Тэтгэврийн насыг нэмэхийг эсэргүүцэж байна”, “Эрчим хүчний салбарын ажилтан бид татвар нэмэхийг эсэргүүцэж байна”, “УИХ-аас гаргасан шийдвэрээ буцаахгүй бол бид тэмцлийн хурц хэлбэрийг сонгоно” зэрэг уриа лоозон барьж эрх ашгаа хамгаалсан юм.

НХХ-ын сайд жагсагчдад боломж байгааг учирлав

НХХ-ын сайд Н.Номтойбаяр уг жагсаалд оролцож, жагсаж байгаа иргэдийг хүндэтгэж байгаагаа илэрхийлсэн байна. Түүнчлэн маргааш буюу ирэх лхагва гарагийн өглөөний 09:00 цагт МҮЭХ-той хэлэлцээрийн ширээнд суухыг уриалж байв.
Түүнийг үг хэлэх үеэр жагсагчид эсэргүүцлээ илэрхийлж байсан ч тэрбээр үүссэн нөхцөл байдлыг хамтдаа бид шийдэх хэрэгтэй хэмээн жагсагчдыг тайвшруулж дараах зүйлийг хэлсэн юм. Тэрбээр “Нийгмийн хамгааллын яамыг хариуцаж байгаа хүнийхээ хувьд МҮЭ-ээс зохион байгуулж байгаа жагсаал цуглаанд та бүхний санал бодлыг сонсохоор ирлээ. Та бүгдийн тавьж байгаа шаардлагыг шийдэх нь Засгийн газрын үүрэг юм шүү. Өнөөдөр та бүхэн хэд хэдэн асуудлаар шаардлага тавьсан. Энэ бүгдийг шийдэх арга зам бий. Цалин, тэтгэвэр тэтгэмж амьдралд хүрэлцэхгүй хэцүү байгааг би мэдэж байна. Тэр ч үүднээс тэтгэвэр, цалингийн зээлд 60 орчим хувь нь хамрагдаж байна. Хуримтлал, хадгаламж гэдэг үг мөрөөдөл болсон нь үнэн. Хоёрдугаарт тэтгэврийн насыг шатлалтай нэмэх зайлшгүй шаардлага гарсан. Хувь хүнд өгөөжтэй байх үүднээс эдийн засгийн арга замаар энэ намрын чуулганаар шийдье гэж байгаа юм. Хуульд заасан тэтгэврийн нас, түүнээс хойш тэтгэврээ тогтоолгоход өндөр хувиар тогтоогддог байх, хийж байсан ажил мэргэжлээс нь шалтгаалж тогтоодог байх, хөдөлгөөнт хөдөлмөр эрхэлж байсан оффисын ажил эрхэлж байсан хүмүүсийн тэтгэврийг заагтай тогтоож байх ажлуудыг хийж байна.Засгийн газар байгуулагдсанаас хойш 56 орчим тэрбум төгрөгийн тэтгэвэр даатгалтай холбоотой өрийг илрүүлсэн. Та бүхэнд загнуулах зүйл хийсэн гэдгээ сайн ойлгож байна. Хамгийн гол нь соёлтой шаардахыг хүсье. Орилж хашхирахаас илүүтэй хамтдаа шийдэх гарц гаргалгааг олъё. Түүнээс энэ жагсаалыг үймүүлэх хэрэггүй юм шүү. Та нарын бухимдалтай байгааг ойлгож байна. Амьдралд нь болж бүтэхгүй байгаа бүхэн та бүхнийг өнөөдөр /өчигдөр/ Сүхбаатарын талбайд хөтөлж авчирсныг маш сайн ойлгож байгаа шүү.Тиймээс гурван талт хамтын хэлэлцээрээр асуудлыг шийдвэрлэхээс өөр гарц гэж байхгүй.Жагсаал цуглаанаас үүдэлтэй шаардлагыг би гардаж авна. Харин нөгөөдөр /маргааш/ өглөө ширээний ард сууя. Юу нь болохгүй байгаа, юу нь болж байгаагаа нээлттэй ярилцъя. Энэ бол хэн нэгэн хүний хувийн асуудал биш улс орон нийгэмд тулгарсан нийгэм, эдийн засгийн, санхүүгийн асуудал гэдгийг сайн ойлгож байгаа байх. ОУВС-гийн хөтөлбөрт орохгүй гээд бид яах юм бэ. Өөр арга зам алга.Тиймээс нөгөөдөр /маргааш/ өглөө яаман дээр 09:00 цагаас МҮЭ-ийн ерөнхийлөгчийг, та бүгдийг урья. Төлөөлөл болгож хамтдаа ширээний ард сууж асуудлаа шийдвэрлэж ярилцъя. Ажил хэрэгч байдлаар тулгамдаж байгаа асуудлыг шийдвэрлэхийг хүсье” хэмээсэн юм.
Салбарын сайд нь ийнхүү өөрийн биеэр ирж, болж буй асуудалд гарц шийдлийг хамтдаа хайя, ярилцъя гэсэнд жагсагчдын сэтгэл ихэд хөдөлж, нөгөөдөр заавал очно хэмээн дор бүрнээ ярилцаж байсан юм. Ямартай ч маргааш НХХ-ын сайд Н.Номтойбаяр жагсаалд оролцсон олон иргэнд сэтгэлийн дэм өгч, асуудлыг нь нааштайгаар шийдэж гарц хайхаар боллоо.

Эх сурвалж: